Lapu-Lapu molusad sa virtual mapping pagpauswag sa turismo

CEBU, Philippines — Gitinguha karon sa Dakbayan sa Lapu-Lapu nga pang-world class ang mga pamaagi sa pag-promote sa turismo, hinungdan nga ilusad nila sa umaabot ang virtual map.

Pinaagi sa maong virtual map masinati sa mga turista ang mas nindot pa nga travelling experience gumikan kay dali nila nga maadto ang mga sikat nga tourist destination.

Pinaagi sa maong app diha sa cellphone dali nilang makita ang mga produkto sa siyudad, ang mga kalihokan ug lakip usab sa kultura nga abunda sa kasaysayan.

Ang maong map makahatag usab kini ug detalye nga available ang mode of transport nga mahimo nilang masakyan paingon sa ilang destinasyon o bisan ang mga sikat nga kan-anan, resorts, massage parlor ug uban pa.

Matud ni Mayor Junard “Ahong” Chan nga ang maong plano makahatag og dako nga kalipay alang sa mga turista apan mas dako kini og kalipay nga mahatag sa siyudad tungod kay mahimo silang tulay nga matultolan sa mga turista ang mga establisamento o negosyo.

Gipadayag ni Chan ang iyang excitement sa resulta sa maong proyekto tungod kay napanglantawan niya nga modoble pa ang mga turista nga mobisita sa siyudad ug daghang mga Oponganon unya ang mahatagan og panginabuhian.

Gibutyag ni Chan nga ang ilang tourism office uban sa IT office naningkamot alang sa maong proyekto uban sa abag sa Mata Technologies Inc.

Sa laing bahin, gihan-ay na karon sa kagamhanan sa Siyudad sa  Lapu-Lapu ang naandan na nga mga kalihokan sa ika-502nd nga pagsaulog sa Kadaugan sa Mactan nga molungtad og usa ka bulan

Naandan na kini nga gihimo sa mga nangangging katuigan apan nahunong kini tungod sa COVID-19 pandemic.

Si John Kristofer Rafols, officer-in-charge sa departamento sa turismo sa maong siyudad nagkanayon nga magsugod sa Marso 27, 2023 ang kalihokan hangtud sa gikatakdang adlaw sa maong tinuig nga selebrasyon sa Abril 27, 2023.

Lakip sa mga kalihokan nga ilang gihan-ay mao ang Dive in Movie Night nga nagsentro sa mga historical documentaries nga naghisgot sa Battle of Mactan. — Romeo T. Limpangog  (BANATNEWS)