CEBU, Philippines — Dugang mga dili lisensiyadong mga eksplosibo ang matud pa nasakmit sa kapolisan gikan gihapon sa propiyedad nga gipanagiya sa mga Teves sa Negros Oriental.
Narekober gikan sa Criminal Investigation and Detection Group (CIDG), Domingo, Marso 26, 2023, ang laing mga improvised explosive device, lakip na ang improvised RPG, mga bala, empty shells, parte sa pistola ug uban pang gidudahang gamit sa pagpamomba sa HDJ Agri -Venture Corp. compound. sa Brgy. Caranoche, Santa Catalina sa Negros Oriental.
Ang CIDG mironda sa lugar sugod pa niadtong adlaw nga Biyernes Marso 24,2023 pinasikad sa search warrant nga giisyu sa usa ka hukmanan sa Sugbu tungod sa illegal possession of firearms.
Matod ni Police Colonel Thomas Valmonte, Chief Legal Division sa CIDG narekober sa mga awtoridad ang tag-as ug mugbo nga armas
“There is M14, then short firearms, 45, 38 and 9 mm caliber. 3 IEDs, and one RPG and thousands of live ammunition, and we also found empty shells that we call it now as fired shells and fire bullets,” matud ni Valmonte
Ang mga nasakmit nga eksplosibo, mga bala ug uban pang mga butang naugkat gikan sa gilubngan niini 10 hangtod 12 ka tiil ang gilawmon.
Nagsugod sila sa pagkalot alas 5 sa hapon ug nakit-an ang mga butang mga usa ka oras. Narekober ang tanang ebidensiya sulod sa lugar nga “compound” sa HDJ company nga gipanagiya ni Pryde Henry Teves, igsuon ni Negros Oriental 3rd District Rep.Arnulfo Teves Jr. Gawas sa mga bala ug armas, narekober usab nila ang lainlaing mga hulagway ni anhing Gobernador Roel Degamo, usa ka sketch ug hulagway sa usa ka building ug ingon man mga kuwarta.
“Meron pong nakuha na cash money sa van, ito naman pong van ay itinuro ng ating witness,” sigon ni Valmonte.
Tulo ka mga matud pa sakop ni Teves ang gidakop.
“Itong tatlong suspect, allegedly sabi nya one Nigel Electona, he is the chief security, personal security of Pryde Henry Teves, at ito namang dalawa ay mga tao niya,” matud Valmonte
Matud pa nga sa report si Nigel nalambigit sa masaker sa Pamplona, Negros Oriental nga niresulta sa kamatayon ni Degamo ug walo ka mga inosenteng sibilyan diha mismo sa ganghaan sa panimalay sa gobernador.
Niadtong adlaw nga Biyernes dunay mga klase-klaseng high powered firearms ug mga bala nga nasakmit sa maong compound, nasundan sab kini og laing pagkadiskubre sa tag-as nga kalibre sa armas nga gisud og sako diha sa katubhan sa maong compound.
Giklaro usab ni Valmonte nga walay kalambigitan ang ilang operasyon sa masaker sa Pamplona, Negros Oriental tungod kay kabahin kini sa flagship program sa CIDG nga Oplan Paglalansag, usa ka kampanya batok sa illegal firearms. (BANATNEWS)