Pagdaginot sa tubig giawhag sa NWRB
CEBU, Philippines — Ang gobiyerno nangandam na karon sa pagsulod sa El Niño phenomenon karong tungatungang bahin ning tuiga, mao nga ang National Water Resources Board (NWRB) niawhag karon sa publiko nga magdaginot sa paggamit sa tubig.
Si Sevillo David Jr., NWRB executive director miingon nga kun magdaginot ang katawhan sa paggamit sa tubig makatabang nga dili mahitabo ang nahitabo niadtong tuig 2019 dihang ang water level Angat Dam sa Luzon nius-os og maayo kutob 116 meters.
“In 2019, few typhoons entered the country. As a result, we experienced the lowest level of Angat Dam of 116 meters in June, July in 2019. We want to prevent this from happening again,” matud pang David.
Ang Angat Dam kinahanglang 180 meters ang minimum nga tubig niini aron epektibong maka-operate. Mao nga kinahanglang buhaton ng daan ang tanang gikinahanglan aron dili kini moabot sa peligrosong sitwasyon.
Kagahapong adlawa, Sabado, ang Angat Dam dunay 204.3 meters nga tubig apan mius-os kini gikan sa 204.63 meters niadtong adlaw nga Huwebes ning semanaha.
Ang Philippine Atmospheric, Geophysical and Astronomical Services Administration (PAGASA) daan ng mipahibalo nga mosulod ang El Niño karong Hunyo o Hulyo.
Nagpasabot kini nga posibleng mas menus ang gidaghanon sa mga bagyo o pagbunok sa uwan nga masinati atol ning mga panahona.
Ang Angat Dam maoy nagsuplay sa 90 porsiyentong panginahanglan sa Metro Manila ug gikuhaan og tubig alang sa irigasyon sa 25 mil ka ektaryang mga umahan sa Bulacan ug Pampanga. (BANAT NEWS)
- Latest
