CEBU, Philippines — Nadakpan sa kapolisan sa Lapu-Lapu City Police Office (LCPO) ang usa sa most wanted person sa nasud nga naapil sa listahan sa Department of Interior and Local Government (DILG).
Ang nasikop nga wanted naila nga si Bonifacio Bonsobre Jr. 30 anyos taga Bankal siyudad sa Lapu-Lapu ug adunay patong sa ulo nga P149,000 tungod sa kasong pagpanglugos sa minor de edad nga giatubang niini niadtong tuig 2013.
Suma pa ni Police Captain Noah Añana, deputy chief sa City Intelligence Unit (CIU) nga nagtago tago kini mga napulo na ka tuig ang nakalabay sa Lanao del Sur.
Dihang nakakuha sila og kasayuran sa nahimutangan ni Bonsobre dali usab silang nangayo og panabang sa kapolisan sa maong lugar nga maoy hinungdan sa pagkasikop niini.
Si Police Colonel Elmer Lim, director sa LCPO miingon nga ilang andamon ang mga gikinahanglang rekisitos sa DILG alang sa pagproseso sa paghatag sa ganti niadtong nakahatag og impormasyon sa nahimutangan sa maong suspetsado. (BANAT NEWS)