CEBU, Philippines — Nihangyo si Cebu City Councilor Donaldo “Dondon” Hontiveros sa Department of Education (DepEd) Cebu City School Division alang sa ilang suporta nga unta dugangan pa og daghang magtutudlo nga mohupot sa out-of-school youth nga nipaubos sa Alternative Learning System.
Nasayran nga dul-an sa 6,000 ka out-of-school youth ang kasamtangang na-enroll sa maong programa sa Dakbayan sa Sugbo ug anaa lang sa 26 ka magtutudlo ang kasamtangang naghupot niini.
Si Hontiveros kinsa nibisita kagahapon sa buhatan sa DepEd-Cebu City alang sa paglusad sa Cebu City Olympics nagkanayon nga ang siyudad nagkinahanglanog dugang mga magtutudlo alang niini.
Nagakanayon ang konsehal nga mopanday siya og resolusyon alang sa maong tinguha.
Si DepEd-Cebu City OIC/Superintendent Bernadette Susvilla nihatag na og positibong tubag niini.
Matud ni Hontiveros nga gipaniguro sa kagamhanan sa siyudad nga matabangan ang kabatan-onan nga malakip sa programa kalabot sa edukasyon.
“It is a vision of Mayor Mike Rama nga no one should be left behind, so tabangan pod ni nato ang atong mga out-of-school youth”, dugang ni Hontiveros. — Caecent No-ot Magsumbol/BDB (BANAT NEWS)