MANILA, Philippines — Dugang walo ka mga pampublikong tunghaan sa Dakbayan sa Talisay ang nahatagan og mga closed circuit television equipment.
Si konsehal Eduardo “Digul” Gullas III, chairman sa committee on education nipahibawo nga lima ang ilang nahatag sa elementarya samtang tulo sab ang ilang nahatag sa sekondarya nga mga kahimanan paghatag og seguridad sa kabataan ug mga magtutudlo.
Matud pa ni Gullas nga ilang paningkamotan nga sa dili pa matapos ang unang kwarter ning tuiga ila nang mahatagan ang tanan gyud nga pampublikong tunghaan sa siyudad. Ang pagpanghatag og CCTV equipment ni Gullas nasugdan na niadto pang miaging tuig pero gi anam-anam lang kini paghatag depende sa pundo nga ipamalit og kahimanan sa Dakbayan.
Nalipay lang sab si Gullas kay suportado ang iyang programa sa iyang kauban sa konseho ug sa mayor.
Dugang pa niya nga gumikan sa mga panghitabo karon angay lang nga mabutangan og CCTV camera ang mga tunghaan aron kung adunay mga krimen nga mahitabo dali sa paggukod sa mga tawo nga responsable.
Dugang pa sa konsehal nga dili lang tinun-an ang mahatagan og seguridad kun dili lakip na ang mga magtutudlo ug ang eskwelahan nga dili mabiktima sa pag among-among.