Pagpanghilo sa mga iro giimbestigar sa kapolisan

Naghimo karon og lawom nga imbestigasyon ang kapulisan sa Dakbayan sa Naga mahitungod sa giingong kamatayon sa dili mominos 40 ka mga iro sa usa sa mga subdivision. Gidudahan nga ang mga iro gipanghiloan.

Matud pa ni Police Lt. Colonel Junnel Caadlawon, hepe sa Naga City Police Station ang maong insidente nahitabo kini sa usa sa mga subdivision sa Barangay Inoburan.

Nadiskubrehan kini human nanimaho og patay ang ilang subdivision ug sa dihang gisubay, daghang mga patay nga iro bisan asang suok sa ilang dapit.

Nangaylap na sila karon og mga kopya sa mga CCTV footage nga kuha sa lugar aron makatabang  pagtumbok kun kinsa ang nanghilo sa maong mga iro.

Una niini, gikatahong dunay mga nangreklamo tungod sa kadaghan na sa mga libud-suroy nga iro sa ilang lugar nga magpataka lang og kalibang bisan asa.

Si Caadlawon miingon nga dili lang mga iro nga libud-suroy kondili hasta kadtong mga inampingang iro sa mga homeowners nga nakagawas sa ilang tugkaran naapil og kahilo.

Karon adlawa Pebrero 4 nagtinguha sila nga mohimo ug clean-up drive sa maong dapit uban sa mga homeowners aron malimpyohan ang maong subdivision.

Pangitaon sab nila ang uban pang mga iro nga posibleng nakakaon sab og hilo nga wala pa igkita.

Ang hepe sa Naga City Police Station, niawhag sa mga residente nga mahimong responsable ngadto sa mga kahayupan ilabi na ngadto sa ilang mga binuhi.

Gidasig usab ni Caadlawon ang katawhan nga dili magpanuko sa pagpangayo og tabang ngadto sa mga local government unit kung makakita sila og mga libud-suroy aron mahipos inay nga panghiloan kini.

Ang pagpasipala sa mga mananap dunay dakong silot dinhi sa Pilipinas kun mapatud-an kinsa ang sad-an. Bisan gani ang tagiya sa mga hayop kun iresponsable mahimo mang masilotan sa balaod.

Kung mahinumduman ang maong panghitabo unang gikataho ngadto sa Island Rescue Organization, usa ka non-profit organization nga adunay daghan mga volunteer nga andam motabang sa kahimtang sa mga kahayupan ilabi na kadtong mga giabusaran. —/IBM (BANAT NEWS)