Gullas pabor sa off-site sim registration sa Talisay
CEBU, Philippines — Bukas ang kagamhanan sa dakbayan sa Talisay sa posibilidad sa pagahimoon nga off-site sim registration sa kabarangayan.
Gani si konsehal Eduardo “Digul” Gullas III, chairman sa committee on Education and Information Technology nipadayag sa iyang kaikag nga makig estorya sa mga telecommunications companies aron himoon ang off-site sim registration.
Matud pa ni Gullas nga adunay pipila nga nahuman na sa pagrehistro sa ilang mga numero apan daghan pa usab ang wala pa ilabi na kadtong dili kaayo makamao niini.
Asoy pa niya nga daghan nga benepisyo ilabi na sa seguridad ang pagrehistro sa sim card busa ang iyang buhatan andam makigestorya sa taga telcos aron iya sab kining ipaabot ngadto sa mayor aron mahimoan og aksyon.
“To everyone we should follow this kay balaod kini. It takes time daghan sab ka benefits nga makuha. Let`s do it and spend time for this nga matuman,” dugang pa ni Gullas.
Gikalipay sab ni konsehal Joel Orbiso sa Barangay Jaclupan kung mahitabo ang off-site sim registration tungod kay mismo siya ug ang mga kauban niya sa konseho ang wala pa sab makapa rehistro sa ilang sim.
Gani iyang giangkon daghan pa sab sa iyang mga konstituwente nga wala pa makarehistro sa ilang numero kay dili techy o adunay kalisdanan sa signal.
Dugang pa ni konsehal Orbiso nga kung adunay off-site sim registration sila magiyahan ug mapadali nalang ang pagrehistro. (BANAT NEWS)
- Latest
