CEBU, Philippines — Nasakpan ang lima ka mga kanhi tiggamitan og ilegal nga drugas nga ni-surrender na ug nipaubos og community –based drug rehabilitation program sa siyudad sa Talisay human napositibo sila niini sa gihimong random drug test.
Ang maong drug surrenderees gikan sa Barangay Lagtang, Dakbayan sa Talisay nga gipaubos sa Community Based Treatment-Matrix Intensive Outpatient Program (CBT-MIOP) apan nitipas gihapon sa dalan.
Si Police Captain Jose Nilo Abello nibisita pagbalik sa lima diha sa ilang pinuy-an aron sa pagawhag nga hingpit na nga magbag-o.
Matud pa ni Abello nga kung dili gyud sila mosanong sa hangyo ilang i-evaluate kung unsa ang ilang koneksyon sa mga durugista nga padayong nagpayuhot og ilegal nga drugas diha sa ilang dapit aron kahimoan og operasyon aron dakpon.
Si Police Lt. Col. Randy Caballes, hepe sa kapolisan sa maong dakbayan miingon nga seryoso sila sa pagtabang sa mga na adik sa drugas.
Apan kun ila gyud nga pilion ang maong bisyo ug mamaligya niini, dili sila magpanuko sa pagdakop kanila. — /IBM (BANAT NEWS)