CEBU, Philippines — Patay ang usa ka 44-anyos nga lalaki human kini naligsi sa pasaheroang bus samtang nagbisikleta kagahapon sa buntag diha sa national highway sa Barangay Tunghaan, Lungsod sa Minglanilla.
Nasayran nga nakuha sa camera sa Minglanilla Command Center ang maong insidente.
Ang biktima mao si Jinske Patalisa, 44-anyos, kasamtangang nagpuyo diha sa Barangay Tungkop sa nahisgutang lungsod.
Ang drayber sa bus mao si Roel Jorolan kinsa natingkagol karon diha sa detention cell sa Minglanilla Police Station.
Base sa imbestigasyon sa kapolisan nga ang bus padulong sa Dakbayan sa Sugbo ug nagkatungod kini ug ang bisikleta kinsa padayon nga nagpadagan paingon sa tunga sa karsada.
Ang bus nitipas kini padulong sa pikas nga lane aron sa paglikay sa nagbisikleta apan giingong nasaghiran sa bus ang nagbisikleta hinungdan nga ang biktima nahagbong diha sa karsada ug nalatayan sa ligid sa bus. (/BDB)(BANAT NEWS)