CEBU, Philippines — Nasikop sa mga sakop sa Drug Enforcement Unit (DEU) sa Dakbayan sa Talisay ang usa ka E-bike driver diha sa sitio Mananga 2, Barangay Tabunok niadtong Sabado sa gabii.
Ang dinakpan mao si Keesha Mae Francisco Labitad alyas Shamae Labitad, 18 anyos nga taga Barangay Ermita, siyudad sa Sugbo.
Si Police Captain Elwood Ebona nagkanayon nga ila nang napanid-an si Labitad sa iyang kalihukan hinungdan nga ilang gipahigayon ang operasyon.
Nakuha gikan kang Labitad ang shabu nga nitimbang og 25 gramos nga adunay gibana-bana nga balor nga P170mil ka pesos.
Matud pa ni Ebona nga nagsugod sa ilegal nga negusyo si Labitad niadtong Oktubre sa miaging tuig.
Ang iyang operasyon sa illegal nga drugas gihimo diha sa Ermita ug Tabunok ug makadispatsar siya og shabu nga moabot sa 50 gramos matag semana. Giingon nga ang tinubdan niya sa illegal nga drugas mao ang usa ka ginganlan og Weng-weng.
Ang dinakpan nagpaabot nalang nga pasakaan og kaso samtang gibalhug na sa bilangguan. (BANAT NEWS)