Nanguha sa Christmas decors sikop, laing duha gipangita sa kapolisan

CEBU, Philippines — Gipangita na sa kapolisan sa Police Station 1 sa Cebu City Police Office ang laing duha ka kauban sa 33-anyo nga lalaki nga nadakpan tungod kay giingong maoy responsable sa pagkuha sa mga Christmas decoration nga gibutang sa Cebu City government diha sa mga center islands, skywalk diha sa Osmeña Boulevard ug uban pang bahin sa siyudad.

Nadakpan ang suspetsado pasado alas 4:00 sa hapon niadtong Domingo diha sa Barangay San Antonio, Dakbayan sa Sugbo.

Apan wala una gibutyag sa kapolisan ang ngalan niini tungod kay aduna pa sila’y gihimong follow up operation aron sa pagsikop usab sa duha ka kauban niini.

Base sa report sa kapolisan nga giingong adunay nakakita sa suspetsado nga maoy usa sa responsable sa pagpangawat niadtong November 16, 2022 diin sa maong adlaw unang na-report nga nawala ang duha ka tarpaulins nga adunay Christmas greetings ni Mayor Michael Rama.

Si Police Major Efren Diaz, hepe sa Police Station 1 nagkanayon nga ang mga tarpaulin nga gipangkuha sa suspek ibaligya og P300 sa mga manindahay diha sa Carbon Public Market.

“Ila ning ibaligya sa Carbon, ibaligya og P250 or P200 for pang-cover sa mga prutas sa mga nagbaligya sa Carbon”, matud ni Diaz.

Ang direktor sa Cebu City Police Office Ireneo Dalogdog nibutyag nga ang suspek nadakpan na usab kaniadto tungod sa kasong robbery ug pangpanguha og cable wires.

Niining ulahi lang, ang Cebu City government nagpatabang sa kapolisan sa Dakbayan sa Sugbo human nga nangawala ang ilahang mga Christmas decoration nga gipamutang nga kabahin sa Christmas City project sa kagamhanan sa siyudad. (BANATNEWS)