Seguridad sa mga tinun-an mas gitutokan

CEBU, Philippines — Mas gipahugtan sa kapulisan sa Cebu City Police Office ang pagbantay sa seguridad sa tunghaan sa siyudad aron masiguro ang kaluwasan sa mga tinun-an human sa nahitabong ‘mass shooting’ sa usa ka nursery school didto sa nasud sa Thailand niadtong adlaw nga Huwebes nga gikamatay og 37 ka mga tawo kadaghanan mga bata.

Gawas niini, hugot sab silang nakig-alayon ang kapolisan sa mga kadagkuan sa tunghaan ug mga barangay aron moabag sa pagsiguro sa seguridad sa mga eskwelahan ingon man sa mga estudyante. Bisan tuod og wala’y mga susamang panghitabo dinhi sa Siyudad sa Sugbo kaniadto, apan dili gihapon mokompyansa ang kapulisan.

“Sa atoa diri although wala namang nangyayari na similar incident gaya nung mass shooting sa daycare center sa Thailand sa atoa diring atong i-strengthen ang atong police presence ilabi na didto sa mga eskwelahan, actually sa atong practice karon naa naman tay mga police personnel nga every morning lalo na sa kanang pag start sa pasukan sa mga bata naa tay mga personnel nga gina-deploy unya kini siya gina-alalayan pud ni siya sa atong mga Barangay tanod mao na kinahanglan naa tay strong partnership with the Barangay officials ang other stakeholders para mapanindot nato ang atoang peace and order situation sa Cebu City,” sigon ni Police Col. Ireneo Dalogdog, City Director sa Cebu City Police Office.

Sa impormasyon nga nigawas ang suspect sa mass shooting incident sa Thailand usa ka kanhi sakop sa kapolisan nga na dismiss gumikan sa kalambigitan sa illegal drugas ang gunman. Si Dalogdog miingon nga usa sa ilang giatiman sa PNP ang kahimsog ug katarong sa panghunahuna sa mga sakop sa kapolisan.

Mao kini ang rason kun nganong subsob ang internal cleansing nga gihimo sa PNP lakip niini ang pagpahigayon og random drug testing, pagpahinumdom kanila sa ilahang responsibilidad ,trabaho ug uban pa.

“Pinaka basic gyud na nga i-remind nato ang atong PNP personnel in fact naa man tay ginatawag og weekly staff conference mag-participate, mag-attend para i-remind sila ng previous activities nial for the past few days and then i-remind sila kung ano yung directive and then i-remind sila ano yung dapat nilang gawin sa day to day na trabaho nila,” ni Dalogdog pa. — /IBM (BANAT NEWS)