Upat ka bata naangol sa kilat

CEBU, Philippines — Upat ka menor de edad ang naangol human sila naigo sa kahoy nga nagisi human kini naigo og kilat diha sa Sitio Kagang, Barangay Dumlog, Dakbayan sa Talisay kagahapon sa udto atol sa pagdag-om sa kalangitan.

Ang mga bata nagpangidaron og 4 ngadto sa 8 anyos  nga tulo ka mga lalaki ug usa ka babaye nagduwa dapit duol sa maong punoan sa Talisay dihang nahitabo ang insidente.

Si Alvin Santillana, pangu sa City Disaster Risk Reduction and Management Office miingon nga ilang nadawat ang alarma mga alas 12:08 sa udto.

Sa ilang pagabot sa lugar swerte nga wala gyud maantimano sa pagkaigo ang mga bata sa kilat kay didto kini miigo direkta sa punoan sa kahoy apan napiskan sa kahoy ang maong mga bata.

Ang punoan sa Talisay nabuak sa tunga ug napanitan, samtang makita sab nga duna kini sunog kun diin gituohang niigo ang kilat nga mikatay padung sa yuta nga nabuslot sab.

Ang mga bata nangasamad sa buko-buko, kilid sa mata ug sa bukton gumikan sa kahoy nga nituasik ug miigo kanila.  Wala man tuod nag uwan sa dapit apan baga ang dag-om sa kalangitan sa maong lugar nianang tungora. Ang tulo  kanila gidala sa tambalanan samtang ang usa wala na kinahanglana nga dad-on sa tambalanan, apan silang tanan nangalisang. —IBM (BANATNEWS)