Gullas dili una motugot sa operasyon sa floating cottage

CEBU, Philippines — Dili una motugot si Mayor Gerald Anthony “Samsam” Gullas nga adunay floating cottage nga mag-operate diha sa kadagatan sa Dakbayan sa Talisay.

Kini human si Gobernador Gwendolyn Garcia nipagawas og kamandoan nga gidid-an ang ang mga tawo sa pagkaligo sa dagat sulod sa 33 ka ektarya nga anaa nahimutang ang fixed ug floating cottage sa Lungsod sa Cordova.

Ang wala pag-regulate sa fixed ug floating cottage maoy nakatampo sa pagkahugaw sa kadagatan sa maong lungsod.

Ug gumikan niini si Gullas nidesisyon nga dili lang una magpa-operate og floating cottage.

Sayo pa, si Gullas nipasabot nga makadugang sa turismo ang floating cottage apan magkinahanglan kini nga ma-regulate aron usab maprotektahan ang kalikupan.

Nasayran nga ang konseho sa siyudad nagplano sa paggama og ordinansa kalabot sa regulation sa floating cottages.

Sa pagkakaron, gipasiguro ni Gullas nga magpabilin nga limpiyo ang kadagatan ug kabaybayonan sa mga coastal nga barangay sa siyudad. BDB (BANATNEWS)