CEBU, Philippines — Moabot sa 15 ka mga bata gikan sa tulo ka barangay sa siyudad sa Mandaue ang mga benepisaryo sa ‘Iskolar ni Tsip’ nga gilusad sa Police Station 2 sa Mandaue City Police Office (MCPO) niadtong adlaw’ng Martes.
Ang maong mga bata residente sa Barangay Subangdaku, Bakilid ug Tipolo nga sakop sa Police Station sa MCPO.
Suma sa Hepe sa Police Station 2 Police Major Romeo Caacoy Jr. kadtong mga police personnel nga na-assign sa mga barangay mipili og mga less fortunate nga mga bata aron mahimong beneficiary sa ‘Iskolar ni Tsip’.
Ang maong mga bata mao kining wala’y ginikanan, giabandonar ug wala gyuy kapasidad nga maka-eskwela.
Gipasabot ni Major Caacoy sulod sa usa ka school year suportaran nila ang pagtungha sa maong mga iskolars nga gikan sa nagkalain-laing grade level kini pinaagi sab sa tabang sa mga private stakeholders ingon man sa mga police personnel sa Police Station 2.
“Ang PNP sa Station 2 willing sad kaayo mo contribute para aning maong programa para matagaan ni sila og support sa ilang pag-eskwela. From Grade 1 up to highschool ang pinaka senior nato Grade 8”, sigon ni Police Major Caacoy.
Si Maria Fe Ouano, 29 anyos mihilak dihang nahinabi sa Banat News kay matud pa niya maglisod gyud siya og pa eskwela sa iyang mga anak kay wala siya’y trabaho.
Nalipay kini nga apil ang anak nga nag-edad og 9 anyos nga maka-eskwela sa Grade 1.
“Duha akong anak, ganahan ko maka eskwela akong anak”, ni Ouano pa.
Si Major Caacoy miasoy ang Police sa Barangay(PSB) gitahasan sa pag-monitor sa mga estudyante kun nakapadayon na sa ilahang pag-eskwela, kun pananglitan dunay mahunog, tan-awon nila ang hinungdan ug kun dili na gyud sila mopadayon desisyonan nga tangtangon sila sa programa.
Nasayran nga dili kini ang unang higayon nga gihimo ni Police Major Caacoy kay dihang nahimo siyang hepe sa Catmon Police Station iyaha sab kining gibuhat. MEL (BANATNEWS)