Siyam ka tawo nga nalambigit sa drugas ug sugal nasikop

CEBU, Philippines — Tulo ka suspetsadong durugista ang nasikop atol sa gipahigayong buy bust operation sa mga sakop sa Philippine Drug Enforcement Agency Regional Special Enforcement Team diha sa Barangay Quiot Pardo, Dakbayan sa Sugbo niadtong Martes sa gabii.

Ang subject sa maong operasyon mao si Helbert Gallendo, 46-anyos, walay trabaho giingong tigmentinar sa drug den ug lakip sa nasikop ang iyang mga parokyano nga sila si Maria Elena Gimena, 40 ug Alvin Piala, 48, parehong walay mga trabaho.

Nasakmit gikan sa mga suspetsado ang lima ka putos nga shabu nga nitimbang tanan ngadto 10 gramos ug nibalor tanan ngadto sa P68 mil, buy bust money ug kagamitan sa pagsuyop og shabu.

Matud ni Leia Albiar-Alcantara, tigpamaba sa PDEA-7 nga dili mominos sa 50 gramos nga shabu ang madispatsar sa suspetsado matag semana.

Si Alcantara nagkanayon nga ika-26 na ang maong operasyon sa pagbungkag sa drug den diin ikatulo diha sa Barangay Quiot.

Sa laing bahin, nasakmit sa kapolisan ang  53 ka paketeng shabu uban sa usa ka armas nga pugakhang sa usa ka adlaw nila nga pagpahigayon sa Simultaneous Anti-Criminality Law Enforcement Operation (SACLEO)nga gipahigayon sa Cordova Police Station diin pito ka tawo ang nasikop.

Si Police Major Michael Gingoyon, hepe sa Cordova Police Station niila sa suspetsado nga mao sila si Alexander Inoc Degamo, 55 ug Alejandro Cabido Esabas, 59 anyos parehong residente sa Barangay Poblacion sa maong lungsod.

Nasakmit gikan sa mga suspetsado ang shabu nga nikantidad tanan ngadto sa P15,000 ug usa ka improvised shotgun nga adunay upat ka buhing bala.

Samtang pinasikad sa warrant of arrest nga giluwatan  sa korte ilang nasikop si Luisito Baclohan alyas “Luisito Tisoy”, 41, nagpuyo diha  sa Barangay Poblacion sa nahisgutang lungsod.

Laing tulo usab ka tawo kinsa nalambigit sa tigbakay ang nasikop sa kapolisan sa lungsod. Romeo T. Limpangog/BDB (BANATNEWS)