Pundo sa pagtukod sa kapitolyo sa balamban andam na
CEBU, Philippines — Ipadayon sa Probinsya sa Sugbo ang plano niining pagtukod sa government center didto sa lungsod sa Balamban.
Si Gobernador Gwendolyn Garcia gusto nga masugdan dayon ang maong proyekto ilabina nga adunay pundo nga gigahin gikan sa nasudnong panudlanan.
Ang nasudnong pangagamhanan nigahin og P200 million alang sa pagtukod sa maong government center nga ang desinyo replica sa Cebu Capitol nga nahimutang sa dakbayan sa Sugbo. Ang P200 million nga pondo giagi sa Department of Public Works and Highways-Central Visayas (DPWH 7).
“We are moving forward and we will need to start already lest the amount of P200 million be set aside. That is why the DPWH is anxious to start,” matud ni Garcia.
Gawas sa P200 million gikan sa national government, ang Cebu provincial government nigahin na sab og P500 milyones alang sa maong proyekto.
Ang gobernador nakigtagbo na sa mga opisyal sa DPWH 7 gipangulohan sa regional director niini nga si Ernesto Gregorio Jr., niadtong Agosto 3 aron hisgotan ang maong proyekto.
Gitug-an ni Garcia nga padayon pa ang negosasyon sa mga tag-iya sa luna nga tarokan sa maong edipisyo sanglit nihangyo man ang Kapitolyo og mas ubos nga presyo matag metro kwadrado sa luna.
Plano unta sa gobernador nga mopalit ang Probinsya og 100 ka ektarya apan dili sigurado ang gobernador kon realistic ba kini. —MEL (BANATNEWS)
- Latest
