Mga istraktura diha sa Kinalumsan River gipaguba

CEBU, Philippines — Si Cebu City Councilor Jerry Guardo, chairman sa committee on infrastructure nagkanayon nga walay pillion gamay o dako nga istraktura o mga edipisyo kong makita nga nilapas kini sa sapa ipaguba nila kini sa padayong clearing operation nila diha sa Kinalumsan River.

Gibutyag ni Guardo nga ang warehouse sa usa ka pribadong kompaniya nga 6-meters ang gilapdon nga pag-encroach sa Kinalumasan ang gipaguba.

Gipatawag sa siyudad ang kadagkoan sa maong warehouse ug gipasabot nga ang ilang istraktura nikawat sa sapa ug human mapasabot boluntaryo usab kini nga niguba sa habig sa warehouse nga nilapas sa sapa.

Nasayran nga nagpadayon ang clearing operation sa mga istraktura nga diha sa Kinalumsan River diin usa ka semana ang gihatag nga tagal ni Mayor Michael Rama aron mahuman nag clearing operation sa maong dapit.

Niabot ngadto sa 20 ka istraktura ang gi-cleared sa dapit diin kadtong mga wala pa makadawat og financial assistance gikan sa Cebu City Government temporaryo nga gipahiluna diha sa eskwelahan ug gipasaligan nga tabangan sila sa gobiyerno.

Sa laing bahin, nipahigayon og dredging ug desilting  operation ang City Department of Engineering and Public Works (DEPW) diha sa South Road Properties kahahapon aron mamenosan ang baha sa maong dapit.

Kini human nasayran nga taga hawak nga baha ang naabot sa underground parking sa usa ka condominium sa lugar nunot sa kusog nga pag-uwan sa niaging gabii.

Base sa video nga gi-upload ni Alain Delon Montesclaros giingong 36 ka  sakyanan lakip na ang mga motor ang naguba gumikan sa baha.

Samtang si Cebu City Mayor Michael Rama nimando og dinaliang pagtabang sa pamilya ni Vasil Baylosis, 31-anyos, kinsa naapil sa pagkaanod uban ang iyang panimalay diha sa Kinalumsan River niadtong Agosto 4, 2022.

Gawas sa ayuda sa Department of Social Welfare and Services (DSWS) ang mga personnel sa Division for the Welfare of the Urban Poor nitabang usab sa pamilya ni Baylosis alang sa financial assistance.

Sa laing bahin usab, si Meyma Casilagan, chief meteorological officer sa PAGASA nagkanayon nga ang nasinati nga dili maayo nga panahon epekto na sa climage change ug gani ang natala nila nga gidaghanon sa uwan sobra kaayo sa average normal sa buwan sa Agosto.

Samtang si Atty.Rose Liza Osorio sa OCEANA nagkanayon kini nga ang pag-usab-usab sa lakat sa panahon tungod sa epekto sa klima gumikan kay ang atmosphere na trap na sa kadaghan sa green house. Thea Sophia M. Disabelle, Rowena D. Capistrano/BDB (BANATNEWS)