CEBU, Philippines — Nangita karon og pundo ang Kapitolyo alang sa bonus sa mga empleyado niini atol sa founding anniversary sa Probinsiya sa Sugbo.
Si Gobernador Gwendolyn Garcia nibutyag nga iyang gipangutana ang budget office pagsuta kon manahimo ba sila nga makahatag.
Karong adlawa sa kasumaran sa Probinsiya sa Sugbo adunay himuon nga programa sa Kapitolyo diin manghatag usab ang probinsiya og bugas nga tag-lima ka kilo ngadto sa mga empleyado, adunay himuong raffle ug adunay paniudto sa matag opisina. Sa laing bahin, gihagit ni Garcia ang department heads ilabi na ang provincial treasurer alang sa mas epektibo nga pag-kolekta sa kita sa Probinsiya sa Sugbo karong tuiga.
Kini human nga nahimong top 1 ang Probinsiya sa Sugbo sa collection efficiency sa locally sourced revenue matud sa Bureau of Local Government Finance (BLGF).
Base sa datus sa BLGF gikan sa P585.66 milyones nga target collection sa Cebu Province sa niaging tuig nakakolekta ang Kapitolyo og P834.92 milyones nga locally sourced revenue (LSR) o 42.6 porsyento nga collection efficiency.
Matud ni Garcia nga kinahanglang dili moubos ang target collection sa probinsiya sa sunod ug kinahanglang malabwan pa ang target nga koleksiyon. — (/BDB) (BANAT NEWS)