CEBU, Philippines — Gibutyag sa Cebu City Department of Veterinary Medicine and Fisheries (DVMF) nga walay natala nga kaso sa African Swine Fever (ASF) sa Dakbayan sa Sugbo.
Base sa taho sa Public Information Office (PIO) sa siyudad nga si Dr. Jessica Maribojoc, pangulo sa DVMF nagkanayon nga nag-monitor sila sa kasamtangang ASF Zoning Status nga giisyu sa Bureau of Animal Industry ug walay kompirmadong kaso sa maong sakit sa siyudad.
Matud ni Maribojoc nga kon mosulod ang ASF sa Dakbayan sa Sugbo maapekthan ang lokal nga ekonomiya gumikan kay ang Sugbo gikonsiderar nga usa sa mga labing dako nga supplier sa mga produktong baboy.
Ug aron masiguro gidili gihapon sa DVMF ang pag-import og buhing baboy ug mga produkto sa baboy gikan sa mga lugar nga adunay kompirmadong kaso sa ASF, lokal ug international.
Ang departamento nagpadayon usab sa pagpatuman sa higpit nga pag-control sa utlanan pinaagi sa pagbutang og mga meat inspector sa mga pantalan alang sa hugot nga pag-monitor.
Gawas niini, hugot usab nga gibantayan ang mga ihawan sa siyudad. Gibutyag ni Maribojoc nga gitahasan nila ang ilang mga personnel nga mokuha og blood sample sa mga hog farm diha sa mga bukirang barangay sa siyudad aron masiguro nga walay mga hayopan nga nataptan sa virus.
Sa laing bahin, nasakmit sa DVMF ang mga kahon sa meat products gikan sa South Korea ug China ug gilabay dayon kini.
Matud usab ni Maribojoc nga ang maong duha ka lugar nalakip sa 24 ka nasud nga adunay kompirmadong kaso sa ASF sa tibuok kalibutan. BDB (BANATNEWS)