Probinsiya sa Sugbo pabiling luwas sa ASF

CEBU, Philippines — Nagpabilin nga luwas gikan sa African Swine Fever (ASF) ang Probinsya sa Sugbo base sa ASF Zoning Status nga giluwatan sa Bureau of Animal Industry sa katapusan sa Hunyo.

Ang Sugbo maoy usa sa pipila ka lugar sa nasud nga nagpabilin nga ASF-Free.

Ang Cebu Provincial Veterinary Office uban sa National African Swine Fever Prevention and Control Program (NASFPCP) ug sa Regional Veterinary Quarantine Station RVQS sa Central Visayas nipahigayon og tigom aron hisgotan balik ang mga gipatuman nga lakang batok sa ASF niadtong Hulyo 12.  Apil sa gihisgutan ang bantay ASF sa Barangay (BABay ASF) Program, guidelines sa animal movement ug uban pa.

Ang Kapitolyo pinaagi sa Sugbo News, ang media arm niini nagkanayon nga dako ang natampo sa alayon sa Kapitolyo ug sa mga pribadong sector aron mapanalipdan ang P11 bilyones nga hog industry sa Sugbo.

Si gobernador Gwendolyn Garcia una ng nagkanayon nga ipabilin lang gihapon nya ang iyang kamandoan pagdili sa pagpasulod sa buhing baboy ug mga produkto gikan sa mga lugar sama sa Luzon ug Mindanao ug ubang nasud nga adunay kaso sa ASF padulong sa Sugbo.

Apil sa mga stakeholders sa swine industry mao ang Central Visayas Pork Producers Cooperative, Bantayan Island Layer Raiser Hog Association, Cebu Backyard Swine Raisers, Pro Pork, Universal Feeds, Department of Veterinary Medicine and Fisheries ug mga local government units.— MEL (BANATNEWS)

Show comments