CEBU, Philippines — Gidakop sa kapolisan sa Dakbayan sa Talisay ang usa ka 49-anyos nga lalaki human kini nisumbag ug nituok sa iyang kaugalingong inahan diha sa Sitio San Miguel, Barangay Linao, Dakbayan sa Talisay niadtong Martes sa tungang gabii.
Ang biktima mao si Felomina Mancia Amante, 71-anyos samtang ang suspek mao ang iyang anak nga si Ronald
Mancia Amante.
Si Patrolman Ariel Balde, imbestigador sa Talisay City Police Station nagkanayon nga sa wala pa mahitabo
ang insidente natulog na ang biktima diha sa iyang kwarto.
Giibot sa suspetsado ang plug sa electric fan hangtud nga nakamata ang biktima aron sa pagsusi sa
koneksiyon sa electric fan.
Giingong sa pagbarug sa biktima kalit kining gisumbag ug dayon gituok sa suspek.
Matud ni Balde nga gumikan sa nahitabong komosyon diha sulod sa balay sa biktima nibangon ang igsuon sa
biktima ug mga silingan ug gibadlong ang suspetsado.
Nagpakitabang ngadto sa kapolisan ang biktima hinungdan nga nadakpan ang suspetsado.
Gibutyag ni Balde nga kulatado ang biktima sa iyang anak apan karon lang kini nangayo og tabang sa
kapolisan.
Kasong attempted parricide ang gikatakdang ipasaka sa kapolisan batok sa suspetsado. (BANAT NEWS)