CEBU, Philippines — Nadakpan sa kapolisan sa buybust operation ang usa ka kanhi sakop sa Philippine Army diha sa Barangay Pooc, Dakbayan sa Talisay niadtong Huwebes sa gabii.
Ang dinakpan mao si Jonathan Caballero Borja alyas JB, 36, taga Banawa St., Barangay Guadalupe, Syudad sa Sugbo.
Matud pa ni Police Lt. Elwood Ebona sa Drug Enforcement Unit sa Dakbayan sa Talisay nga gihimo nila ang operasyon subay sa mga impormasyong ilang nadawat bahin sa ilegal nga kalihukan ni Borja.
Nakuhaan siya og 10 gramos nga gituohang shabu nga gibana-bana nga balor P68 mil. Nakuhaan sab siya og .45 nga pistola nga adunay lima ka bala.
Si Borja na-dismiss sa serbisyo human siya nag AWOL ug napriso sab kini gumikan sa kaso nga homicide niadtong 2013. Apan nakagawas gumikan sa Good Conduct Time Allowance (GCTA) niadtong 2020.
Ang dinakpan gikatahong miangkon nga gikan sa usa ka Bobby Suico nga taga Dakbayan sa Naga ang drugas nga iyang gibaligya. —/IBM (BANAT NEWS)