CEBU, Philippines — Aksidenteng nidasmag ngadto sa motorsiklo ug truck ang auto nga gimaneho sa usa ka Overseas Filipino Worker (OFW) niadtong Lunes sa gabii diha sa Cebu South Coastal Road (CSCR) sa Barangay Cansojong, Dakbayan sa Talisay.
Si Lloyd Sandoval, hingkod ang panuigon nagmaneho sa ilang auto uban ang iyang pamilya paingon sa habagatan.
Apan pag-abot nila sa nahisgutang lugar nakatulog kini hinungdan nga una niyang nadasmagan ang motorsiklo nga gimaneho ni Mark Briones ug nilahos ang auto ngadto sa lubot sa truck nga gimaneho ni Jonel Janer.
Si Jonathan Tumulak, pangulo sa City of Talisay-Traffic Operation and Development Authority (CT-TODA) nagkanayon nga maayong pagkapiyapi sa atubangang bahin sa auto.
Daling gitabang ang mga sakay sa auto ug swerte kini nga wala ra makaangkon og grabeng kadaot sa ilang lawas.
Matud ni Tumulak nga giangkon ni Sandoval nga pila na ka adlaw siya nga walay tarong katulog sukad sa iyang pag-abot sa Pilipinas. Si Tumulak nipahimangno sa tanan nga kong dukaon man gani likayan ang pagmaneho sa sakyanan. —BDB (BANATNEWS)