Nag-wild kay wala na baliki sa uyab napusilan sa polis

CEBU, Philippines — Nalandig sa tambalanan ang usa ka lalaki human siya nakigpinusilay sa kapulisan sa Dakbayan sa Talisay niadtong Domingo sa kaadlawon sa Purok Matinabangon, Dawis, Barangay Tabunok. Si Ramonelle Chester Rivera Paul, nakaangkon og samad pinusilan sa iyang tiyan human siya gipusil sa mirespondeng mga polis nga giingong iyang gisuklan og pinusilay. Si Police Lt. Col. Randy Caballes, hepe sa kapulisan sa Talisay nibutyag nga dunay nitawag sa ilang buhatan labot sa pagpabuto og armas sa suspek. Nahibaw-an nga nasuko ang suspek human nga dili na gusto nga makigbalik kaniya ang iyang uyab.

Matud pa ni Caballes nga nanghasi ang suspek ug nagpabuto hinungdan nga girespondehan. Pag-abot sa kapulisan nipabuto kini sa iyang armas hinungdan nga nahitabo ang mubo nga binayloay sa bala.

Naigo ang suspek sa iyang tiyan hangtud nga siya nadisarmahan ug nakuhaan og usa ka revolver nga adunay usa ka buhing bala ug upat ka kabhang sa tambor niini.

Luwas naman tuod sa makuyaw nga kahimtang ang suspek apan magatubang siya og upat ka kaso.— IBM (BANATNEWS)