CEBU, Philippines — Pagkahuman sa botasyon niadtong Lunes sa gabii gisugdan dayon sa kagamhanan sa Dakbayan sa Sugbo ang pagpanglimpiyo sa kadalanan ilabi na sa mga eskwelahan diin nagpasad ang election propaganda materials. Matud ni Grace Luardo, pangulo sa Cebu City Environmental Sanitation Enforcement Team (CESET) nga alas 7:15 sa gabii niadtong Lunes nipahigayon dayon sila sa pagpanglimpiyo ug kapin sa duha ka dagkong truck ang nahipos nila nga basura.
Ug posibleng madugangan pa kini tungod kay padayon pa ang ilang pagpanglimpiyo.
Gidasig usab sa kagamhanan ang katawhan nga mohatag og kooperasyon sa pagpanglimpiyo .
Kasagaran sa ilang nahipos nga mga basura mga tarpaulin sa mga kandidato.
Kauban sa CESET ang pipila ka mga departamento sa city hall nga nagtinabangay sa paglimpiyo sa siyudad nga gilangkuban sa Prevention, Restoration, Order, Beautification, and Enhancement, Department of Public Services, Cebu City Transportation Office, Cebu City Environment and Natural Resources Office ug uban pa. BDB (BANATNEWS)