CEBU, Philippines — Subling nangapud-apod og mga hinabang ang Ang Probinsyano Partylist sa nagkadaiyang mga molupyo sa barangay Apas, Mabolo ug Guadalupe sa Cebu City agi og pagsanong sa saad niini pagtabang sa mga nagkinahanglan.
Dul-an 200 ka mga molupyo sa lugar ang natunolan og financial assistance nga P2,000 ngadto sa P3,000 kada usa sumala pa sa partylist. Ang mga representante sa Ang Probinsyano mibisita sa Barangay Apas aron pagpangita sa mga pamilyang maoy labing nagrabehan sa bagyong Odette nga miigo niadtong Disyembre 16, 2021.
Ang grupo migahin og pundo agi og ayuda para sa mga nabiktima sa maong katalagman.
Si Imogeng Judilla, nga usa ka street vendor nga usa sa mga natabangan mipadayag og dakong pasalamat sa hinabang nga iyang nadawat kay matud pa wala siya makalimti human gisaaran nga tabangan.
Para ni Judilla ang P2,000 financial aide nga iyang nadawat dako na og matabang sa ilang panginahanglan karon.
Si Ang Probinsyano Partylist Representative Alfred delos Santos nagpasalamat sab sa mga lokal nga opisyales sa Dakbayan sa Sugbu nga nakatampo pagpili kun kinsay angayang makadawat sa ilang hinabang.
Miapelar hinuon si Delos Santos sa mga Sugboanon nga sublian sila sa ilang katungdanan karon aron mapadayon pa ang ilang adbokasiya sa education, infrastructure, employment, negosyo nga makatabang sa kalamboan sa katawhan.
Sa sayo pa niini, ang partido nakapanghatag na og educational assistance sa 458 ka tinun-an sa high school ug kolehiyo sa Sibonga ug Minglanilla dinhi sa Sugbu.
Ang Probinsyano nalakip sa 51 partylists nga nakadaog sa 2019 elections ug nalakip sa unom ka partilistang nakapalingkod og duha ka representante. —IBM (BANATNEWS)