Talisay Comelec magsugod na og bansay sa electoral board

CEBU, Philippines — Miabot na sa 148 mil ka mga botante ang natala sa buhatan sa Commission on Election (COMELEC) sa Dakbayan sa Talisay karon nga nagsingabot ang piniliay.

Hinungdan nga ang maong buhatan pinaspasay ang ilang pagberipika niini sumala pa ni Anna-Lou Bacho, assistant election officer sa siyudad.

Matud pa niya nangandam na sila sa himuong certification and verification sa mga magtutudlo nga magsilbing electoral board.

Samtang ila sab nga gieskedyul karong Abril 12 ang pagpahigayon sa Oplan Baklas sa mga campaign posters nga wala nabutang sa common poster areas.

Ang mga gipangdili mao ang lapas nga gidak-on sa campaign posters, gipangbutang sa mga kahoy ug poste ug uban pa panangtangon.

Naobserbahan nga ubay-ubay gyud nga campaign posters ang gipangbutang nga nakalapas sa lagda.

Nanawagan si Bacho ngadto sa mga kandidato ug sa ilang mga supporters nga di na sila magpaabot sa comelec nga mobaklas tungod kay klaro naman ang lagda.

Ang maong paagi mao sab ang pagpakita nga tinud-anay sila nga moserbisyo ngadto sa katawhan.— IBM (BANATNEWS)