CEBU, Philippines — Moabot sa 114 ka mga police personnel gikan sa Regional Mobile Force Battalion (RMFB)-7 ang gi-dispatch sa onse ka police stations sa Cebu City Police Office.
Mao kini ang mga police personnel nga gipadala sa siyudad sa Sugbo human si Cebu City Mayor Michael Rama nangayo og augmentation sa Philippine National Police.
Sa wala pa sila gi dispatch sa mga police stations usa ka mubong programa ang gipahigayon atubangan nga bahin sa Cebu City Hall nga gitambungan ni Cebu City Police Director Col. Ernesto Salvador Tagle ingon man ni Mayor Rama.
Suma pa ni Police Lt. Col. Wilbert Parilla, Deputy City Director for Operation sa Cebu City Police Office nga 150 ka police personnel unta ang gi-augment dinhi sa Cebu City apan ang uban wala pa nakaabot kay naa pa sa laing lugar sama sa Bogo ug duna say ubang personnel nga apil sa augmentation nga nag-isolate pa kay nagpositibo sa COVID o na-expose sa nagpositive.
Ang trabaho sa maong mga police personnel mao ang pagpatuman sa EO No. 157 ni Mayor Rama.
Matag police stations 15 ka police personnel ang i-augment ug ang hepe sa matag station mao ang mangita og lugar kun asa sila ipahiluna. Samtang sa laing bahin nagmonitor karon sa kapulisan sa Dakbayan sa Talisay sa mga establisamento nga nagpaburot sa presyo sa mga tambal.
Kini human nakita nga gipanglinyahan ang mga pharmacy ug uban pa nga tindahan nga namaligya og tambal.
Si Police Lt. Col. Randy Caballes, hepe sa kapulisan nibutyag nga wa man tuod sila’y nadawat nga report kabahin sa overpricing sa tambal apan padayon lang sila sa pagbantay sa higayon nga dunay mopahimulos sa higayon.
Apil sa ilang bantayan ang mga mamaligya usab og peke nga tambal. Gabriel C. Bonjoc/MEL (BANATNEWS)