CEBU, Philippines — Temporaryo una nga sirhan ang vaccination sites sa Dakbayan sa Lapu-Lapu sulod sa duha ka adlaw.
Kini base sa pahibalo ni Mayor Junard “Ahong” Chan diha sa iyang social media page.
Matud pa ni Chan, temporyo usa isirado ang mga vaccination sites aron mahatagan ug higayon nga makapahulay ang mga vaccination team ug mga volunteers.
Nagkanayon ang mayor nga nakasabot siya kun unsa kakapoy ang trabaho nila sa milabay nga National Vaccination Day, hinungdan nga angayan nga hatagan sila ug duha ka adlaw nga pahulay.
Ang pagsirado sa vaccination sites gisugdan kagahapon Disyembre 4 hangtud na kini sa petsa 5 aron aduna silay kusog nga moserbisyo na usab sa sunod nga mga adlaw.
Sa nasayran ang Lapu-Lapu nakabakuna og 43, 097 ka tawo sa tulo ka adlaw nga vaccination drive butang nga gipasigarbo usab ni Mayor Chan.
Gipasigarbo ni Chan sa iyang facebook page ang dakung kalamposan sa ilang siyudad sa pagpamakuna, “Di lang sa Metro Cebu kundi sa tibuok Central Visayas gyud nagmadaugon ang atong vaccination operations kay kita ang nagpabiling pinakadaghan sa kinatibuk-ang numero sa indibidwal nga atong nabakunahan. Gani, milapas kita sa atong target maong nakahipos kita og 122% (percentage of daily target) nga gisundan sa Cebu City nga 85% lang, samtang 83% pod sa Mandaue City.” MEL (BANATNEWS)