Mga drayber sa traysikol sa Talisay nanghangyo og ayuda
CEBU, Philippines — Nihangyo ang mga drayber sa traysikol sa Dakbayan sa Talisay nga hatagan sila og ayuda gumikan sa nagpadayon nga pagsaka sa presyo sa gasolina samtang menos ang ilang pagpamasahero.
Ang presidente sa nagkalain-laing asosasyon sa mga drayber sa traysikol maoy nipadangat niini ngadto kang Jonathan Tumulak, pangulo sa City of Talisay-Traffic Operation Development Authority (CT-TODA) atol sa ilang tigom.
Si Felix Anthony, presidente sa mga drayber sa traysikol nagkanayon nga menos ang ilang pasahero ilabi na nga daghan na ang pwedeng kapilian nga kasakyan ang mga pasahero.
Gawas pa niini nisamot ang ilang kaguol gumikan sa nagpadayon nga pagsaka sa presyo sa gasolina.
Sayo pa, ang mga drayber sa traysikol ug e-bike gipanghatagan og ayuda nga bugas ug sud-anon niadtong buwan sa Septiyembre.
Nagpasalamat ang mga drayber sa ilang nadawat nga ayuda apan nihangyo usab sila og lain aron makasustiner sa ilang panginabuhian nga nagkalisod.
Adunay mga drayber nga ganahan nga ibalik og lima nga pasahero ang ilang mapasakay apan adunay uban nga pabilin lang nga tulo ug P15 ra gihapon ang pletehan. BDB (BANATNEWS)
- Latest
