CEBU, Philippines — Silotan ang mga sakop sa Mandaue City Veterinary Office sa higayon nga mamatud-an nga miabuso sa mga hayop atol sa ilang impounding operation.
Suma pa ni Dr. Karen Merilles ang Veterinarian officer sa maong siyudad nga dili sila magduha duha sa pagsilot sa ilang mga personnel nga mamatud-an nga nakahimo og salaud.
Una niini dunay gikatahu nga insidente sa pag-abuso sa hayop sa gipahigayon nga impounding operation niadtong miaging semana diin usa ka iring ang namatay didto sa usa ka subdivision sa Barangay Tipolo.
Hinuon si Dr. Merilles miingon nga dili pa sila makapahamtang og silot sa ilang personnel gawas lang kon kini kapamatud-an.
Sa pagkakaron padayon pang giimbestigar ang maong tahu ug gidasig usab niya ang habig sa mireklamo sa pagpakita og mga ebidensiya.
Dugang pa ni Dr. Merilles nga hugot nga gipanghimakak sa ilang personnel ang maong pasangil ug matud pa pulos buhi ang mga hayop nga ilang na-rescue ug wa kini masayod nga dunay patay nga iring ug ilaha kining nasayran dihang dunay mitahu ngadto kanila. —MEL (BANATNEWS)