CEBU, Philippines — Giangkon sa pangu sa City Health Office sa Dakbayan sa Talisay nga nibalibad sila sa paghatag og bakuna kontra COVID-19 sa mga menor de edad nga adunay gihambin nga sakit.
Suma pa ni Dr. Lino Alanzado nga ilang nasabutan nga likayan nila nga adunay komplikasyon inig human og hatag sa bakuna.
Hinoon ilang giduso ngadto sa Vicente Sotto Memorial Medical Center ang nag edad og 12 ngadto sa 17 anyos nga dunay comorbidities nga gustong magpabakuna.
Kini tungod kay sa pagkakaron, ang Cebu South Medical Center o kanhi Talisay District Hospital wala pay programa sa pag atiman sa mga batan-on nga magpabakuna.
Nagkanayon si Alanzado nga tinguha nila nga luwas ra ang tanan busa ni implementar sila sa maong sistema.
Siya nanghinaot nga makasabot ra ang mga batan-on ug ang mga ginikanan nga ilang nabalibaran.
Ang ilang vaccination site naa nahimutang sa mall sa Barangay Lawaan 1, mall sa Barangay San Roque ug gym sa Barangay Lagtang. MEL (BANATNEWS)