CEBU, Philippines — Gipasanginlang hitman ug notadong tulisan nga salin sa mga niangkong bigtime druglord dinhi sa Sugbu, nasikop sa Criminal and Investigation Detection Group (CIDG)-7.
Giila ni Police Colonel Ireneo Dalogdog, CIDG-7 Regional Chief ang suspetsado nga mao si Emelio Boro kinsa nasikop atol sa buy-bust operation niadtong Oktubre 19.
Si Dalogdog miingon nga ang suspetsado naila nga drug pusher sa Barangay Mambaling ning dakbayan sa Sugbo.
Matud pa sa opisyal, salin sa grupo sa self-confessed druglord nga si Franz Sabalones si Boro. Ang kauban niyang usa sab ka hitman ni Sabalones mao si Aljun Padilla kinsa napatay police operation niadtong tuig 2018.
Gawas kang Sabalones, si Dalogdog miingon nga konektado sab si Boro sa laing gipasanginlang druglord sa Sugbu nga si Jaguar Diaz.
“After the death of Aljun Padilla, itong nahuli nating suspect ay lumipat sa isang grupo na involved din sa isang drug syndicate dito sa Cebu City,” sigun ni Dalogdog.
Sa imbestigasyon usab nasayran nga ang suspek nalambigit usab sa gun for hire nga naglihok sa Cebu City ug South Cebu.
Sa gihimong imbestigasyon duha ka pagpamusil ang gipasangil kang Boro, apan usa ra ang iyang giangkon nga siya maoy nagpatay. Apan bisan wala niya angkona, daan nang giangkon sa mga kauban sa grupo ni Boro nga mao kini ang mamumuno.
“Aside from being a drug pusher,he is also involved in the series of robbery in Cebu City,itong suspect,so ang ginagawa nya after the incident pumupunta siya sa Moalboal para mag lie low,”matud ni Dalogdog.
Gawas ni Boro. si Dalogdog mitug-an nga duna pa silay gisundang laing mga salin sa mga sindikato sa ilegal nga drugas nga naglihok dinhi sa Sugbu ilabi na nga nagsingabot na ang eleksyon sa sunod tuig ug mahimo silang gamiton sa mga politiko.
Una nang nagpasidaan ang Philippine National Police (PNP) sa mga kandidato nga tutokan sila sa mga sakop sa CIDG.
“Kung mayroon mang mag take advantage sa situation na ito, kasi itong mga tao na ito ay ginagamit nila para lang sa sarili nilang interest,” matud pa ni Dalogdog. —IBM (BANATNEWS)