CEBU, Philippines — Moabot og 80 ka panimalay ang hingpit nga naugdaw ug upat ang naangol sa sunog nga niulbo diha sa Sitio Labsalex Salvador Extension sa Barangay Labangon ning Dakbayan sa Sugbo kagahapon sa kaadlawon.
Ang sunog giingong nagsugod sa panimalay ni Richard Tagadi-ad, kinsa giingong usa ka AWOL nga polis, alas 2:39 sa kaadlawon ug hingpit nga napawong alas-4:13 na. Gibana-banang moabot P1.5milyon ang danyos sa maong sunog ug dunay upat nga naangol nga mao sila si Jonas Gamora, 23,, adunay abrasion, Janus Parba,38, naglisod ug ginhawa, Gamaliel Bargamento, 27, samad sa iyang tuong tiil ug abrasion sa wala nga kamot, Rommel Hermoso, 47, adunay abrasion.
Ang kabomberohan, pinangulohan ni Senior Fire Officer 1 Novo Erana, padayon pang naghimo og imbestigasyon aron sayran kung unsay hinungdan sa pag-ulbo niini.
Ilaha pa usab imbestigahon ang tag-iya sa balay kung diin nagsugod ang sunog, ilabi na adunay mga estorya nga nabiyaan nga kandila ug duna say nag-ingong gituyo pagsunog ang balay.
Samtang usa Conchita Reyes, paryente sa kanhi polis nga si Tagadiad, kung diin nagsugod ang sunog nitug-an napugwat sila sa dihang usa ka residente ang nisyagit nga dunay sunog.
Gitabangan pa nilang magtiayon pagbubo og tubig ang balay ni Tagadiad apan nidako na gyud ang kalayo ug dali silang niikyas ug tapot-lawas nalang ilang nadala .
Gitug-an ni Reyes nga dunay nakakita kang Tagadiad apan daw mura lang og walay nahitabo hinungdan nga dali kini nilang gipadakop sa kapulisan.
Si Tagadiad, kanhi polis sulod sa dili mominos 20 ka tuig apan ni-AWOL sa serbisyo human gipasanginlang nalambigit sa ilegal nga drugas.
Matud pa sa pipila ka mga residente sa lugar, kapila na ka higayon suway nga magdaub-daob sa ilang balay ang kanhi polis. Ang maong kanhi police anaa pa karon sa kustodiya sa Labangon Police Station samtang nagpaabot pa sa imbestigasyon sa kabomberohan ug sa reklamo sa iyang mga silingan.
Ang mga nasunogan nanawagan og tabang kay kadaghanan kanila wala gyuy nasalbar sa ilang mga gamit.
Ang Cebu City Health Department nagpadala dayon og medical team aron pagtabang sa mga tawong naapektahan.
Si Dr. Jeffrey Ibones, Officer-in-Charge sa Cebu City Health Department miasoy gikinahanglan gyud sa mga nasungan serbisyo ilabi na karon nga nagsige og uwan, uso ang ubo ug sip-on, mosaka ang highblood pressure ug uban gipangbati.
Samtang ang Department of Social Welfare and Services Cebu City naghimo na og validation sa mga nasunogan aron mahatagan sila sa ilang batakang panginahanglan ilabi na sa pagkaon.— Decemay P. Padilla/IBM (BANATNEWS)