CEBU, Philippines — Sugod ugmang adlawa, ang mobile vaccination sa Siyudad sa Talisay himuon nang kada adlaw aron mas daghan ang mabakunahan batok Covid-19.
Si Mayor Gerald Anthony “Samsam” Gullas nihangyo sa Talisaynon nga kadtong wala pa nakapabakuna nga magpabakuna na ug mao na kini ang tsansa para nila kay dili na sila kaayo mahago pagadto sa vaccination sites kun naa na sa ilang barangay ang mobile vaccination.
“We are preparing a mobile vaccination schedule for our barangay para at least maduol na gyud ninyo ang bakuna labi na gyud kadtong maglisud sa pag-adto sa atong mga vaccination sites,” nagkanayon si Gullas.
Sa Septiembre 15, taga barangay Dumlog ang eskedyul nga diha ipahigayon sa ilang elementary school. Sa Septembre 16 mao ang barangay Tapul ug Maghaway nga diha ipahigayon sa gym sa Maghaway.
Sa sunod nga adlaw mao ang barangay Mohon diha sa ilang basketbolan dayon ang Poblacion sa hawanan sa Sta. Teresa de Avila Parish ug ang Tabunok sa Septiyembre 19.
Bakuna nights
Sa pikas bahin, gisugdan kagabii sa lungsod sa Consolacion ang Bakuna Nights. Kini ang ilang inisyatibang gihimo aron mahatagan og kahigayonan nga makapabakuna ang mga nagtrabaho sa adlawan.
Magsugod kini alas-7 sa gabii kutob alas-10 sa gabii. Himuon lang kini matag adlaw nga Martes ug Huwebes sa gabii.
Base sa datus Municipal Health Office moabot na ngadto sa 60,046 ang nabakunhanan diin 39,083 ang nakadawat sa first dose ug 28,963 ang sa second dose.
Nunot niini nangita usab ang lungsod og mga paagi nga madasig ang mga molupyo sa pagpabakuna pinaagi sa gipahigayon nga online raffle promo.
Sa uwahong talaan, 80 na ka mga tawo ang nakadaug na sa maong online raffle promo og tag 25 ka kilong bugas ug napulo na usab ka tawo ang nakadaug og gift checks nga P500.
Gawas sa kwarta, may premyo usab nga mga appliances sama sa refrigerators ug uban pa.— Romeo T. Limpangog/IBM (BANATNEWS)