CEBU, Philippines — Kapin na sa usa ka semana nga nagkaminos ang gidaghanon sa mga tawo nga manulod diha sa Cebu City Sports Center partikular ang mag-jogging diha sa oval.
Suma pa sa manager sa CCSC nga si Jundel Bontuyan nga gikan sa 700, kapin na lang sa 200 ang manulod diha sa CCSC sa usa ka adlaw.
Nasayran nga bisan gimontar na ang mega isolation center sa maong sports center, magpadayon gihapon ang pagpasulod sa oval, samtang wala pay pasyente.
Mahunong ra ang operasyon sa CCSC kun aduna nay pasyente ang mega isolation center.
"Samtang wala pay pasyente, makagamit gihapon ang mga tawo sa oval," matud pa ni Bontuyan.
Matud pa niya nga nakasabot ra siya nga nagkaminos ang mosulod niini ilabi na sa sitwasyon sa siyudad nga nagkataas ang kaso sa COVID19.
Ang mega isolation center sa CCSC usa ka back up nga pasilidad sa higayon nga mapuno na ang kasamtangang mga barangay isolation centers (BICs) ug uban pa nga pasilidad sa siyudad nga nag-atiman og pasyente sa COVID19.
Nasayran gisubhan na ang maong pasilidad nga dunay kapasidad nga 200 ka pasyente.
Pipila ka metros gikan sa maong mega isolation center, ipahimutang usab ang isolation room alang sa mga manganakay nga nagpositibo sa COVID19, ug nahimutang gihapon kini sa usa ka bahin sa CCSC. —MEL (BANATNEWS)