Mayor Labella nakagawas na sa tambalanan

CEBU, Philippines — Gikumpirmar sa kampo ni Cebu City Mayor Edgardo Labella nga nakagawas na kini sa tambalanan niadtong Miyerkules sa gabii.

Si Cebu City Administrator Floro Casas Jr. nipadayag nga gisabotan pa kun kanus-a makabalik sa trabaho ang mayor tungod kay kinahanglan gihapon ni Labella ang igong pahuway.

Kahinumdoman nga  kapin sa duha ka semana nga na-admit ang mayor sa tambalanan gumikan sa sakit nga pneumonia niadtong Hulyo 13.

Una na nga gibutyag ni Casas nga  aduna nay dako nga kalamboan sa kasamtangang kondisyon sa panglawas sa mayor.

Matud ni Casas nga posibleng mopaubos sa “work from home” si Labella kun makatrabaho na kini og balik.

Ang kaso sa COVID-19 sa siyudad nagkataas hinungdan nga dili angayang mogawas si Labella ilabi na usab nga usa na kini ka senior citizen.

Matud pa ni Casas nga dili mahimutang si Labella kun dili kini makatrabaho apan ang tanan nag-agad ra gyud sa tambag sa doktor.

Sayo pa, si Casas nihangyo kini sa publiko nga dili magpadala sa nikatap nga fake news kalabot sa estado sa mayor ilabi na sa mga tunglo sa kinabuhi niini.

Gani dunay higayon nga gipamatud-an ni Labella nga okay ang iyang kondisyon pinaagi sa pag-post og hulagway sa iyang Facebook page kun diin makita nga nagbasa siya og bag-ong edisyon sa usa ka mantalaan. —IBM (BANATNEWS)