Rama dili makatubag sa tinuod nga kondisyon ni Labella

CEBU, Philippines — Pila na ka adlaw nga wala makita sa publiko si Cebu City Mayor Edgardo Labella ug daghan na gani ang nangutana kun unsa ang kondisyon niini karon, bisan si Vice Mayor Michael Rama kinsa maoy acting mayor ang dili katubag.

Buot sab ni Acting Mayor Rama nga makahibawo sa sitwasyon ug kondisyon ni Mayor Labella apan kini miangkon nga bisan siya wala siya’y kasayuran sa tinud-anay nga kahimtang ni Labella.

“If you are talking about any close kin of Edgardo, nobody called me, nobody. Number 2, I have to check because I tried calling the telephone number of the City Administrator and it is inaccessible”, sigon ni Rama atol sa press briefing niini niadtong Miyerkules.

Niadtong Hulyo 25 ra unta ang katapusang adlaw nga magsilbing acting mayor sa Siyudad sa Sugbo si Rama human si Labella na-admit sa tambalanan gumikan sa gihambin niining balatian.

Matod ni Rama wala pa siya kadawat og impormasyon sa kampo ni Labella kun kanus-a kini mobalik og trabaho.

Misuway si Rama sa pag-reach out kang Mayor Labella ingon man sa pamilya niini human dunay nanggawas nga istorya nga matod pa si Labella namatay.

Unang miaplear sa publiko sila si City Administrator Atty. Floro Casas Jr ug ang anak ni Labella nga si JP nga hunungon ang pagpakatap og sayop nga impormasyon labot sa kondisyon ni Mayor Labella. —MEL (BANATNEWS)