CEBU, Philippines — Gikatahong adunay mga sementeryo ang giingong napuno na o walay bakante nga mga nitso.
Base sa ulahing record nga nakuha sa kagamhanan sa Siyudad sa Sugbo niadtong Hulyo 26, 2021 napuno na ang sementeryo sa Calamba, Pardo, Queen City, A. Lopez ug Veterans Cemetery.
Sa maong petsa, upat na lang usab ka nitso ang bakante sa sementeryo sa Carretta. Samtang ang coordinator o contact person sa sementeryo sa Calamba nga si Antonio Baguio nibutyag sa Banat News nga dili gyud magkapareha ang adlaw kon aduna bay bakante o wala.
Matud ni Bagyo nga nag-agad ra gyud kini kon adunay habwaon nga bukog o wala.
Nasayran nga niabot ngadto sa kapin sa 20,000 ang nakaplastar nga nitso sa Calamba.
Giklaro hinuon ni Dr. Alice Marie Aycardo, head sa Cebu City Health Cadaver Division nga dili kini angayang itumbok sa pagsaka sa kaso COVID-19 sa Siyudad sa Sugbo tungod kay lahi-lahi ang rason sa gikamatyan niini.
Hinoun adunay pagsaka sa kaso sa COVID-19-related deaths sa buwan sa Hulyo, 2021 kompara sa Hunyo, 2021.
Sa buwan sa Hulyo, 2021 adunay 660 ang natala nga namatay sa siyudad ug 55 niini kalabotan sa COVID-19 lakip na niini ang verified, suspected o probable ug sa buwan sa Hunyo adunay 28 ang namatay.
Ang city health nakigtigom kini sa tinugyanan sa mga punerarya aron pangandaman ang mga sitwasyon nga sama sa niaging tuig diin nagsagunson ang mga nangamatay.
Samtang giklaro ni Aycardo nga aduna pay bakante nga mga nitso sa mga sementeryo sa kabukiran. BDB (BANATNEWS)