CEBU, Philippines — Ang mga drayber sa habal-habal sa Lungsod sa Minglanilla ug Dakbayan sa Talisay gitapok sa niaging adlaw.
Kini alang sa pagtabang kanila nga mahimong organisado ug adunay usa ka dakong tingog sa ilang mga yangungo ug panginahanglan.
Sa Lungsod sa Minglanilla, gitapok ang mga drayber sa habal-habal ug gipasabot sa maayong buhaton aron makatabang sa polisiya sa gobiyerno.
Gihangyo usab sila sa kapolisan nga unta kong unsay ilang makita ug madungog sa palibot kalabot sa hulga sa kahapsay ug kalinaw ilaha kining isumbong aron mapakgang.
Samtang sa Dakbayan sa Talisay, ang mga drayber usab sa habal-habal nga anaa sa kabukiran ang unang gi-organisar.
Si Dr. Jomar Rubio, executive secretary ni Mayor Gerald Anthony “Samsam” Gullas Jr. nibutyag nga dako og papel ang mga drayber sa katilingban.
Ang mga drayber aduna usab kini mga yangongo sa ilang kaugalingon.
Ug matud ni Rubio nga ang kahiusahan sa ilang sektor maoy magdala og tingog ngadto sa kagamhanan aron mahatagan og kasulbaran ang ilang mga yangongo. BDB (BANATNEWS)