CEBU, Philippines — Gitugot na sa Dakbayan sa Mandaue ang walk-ins niadtong mga gustong magpabakuna batok coronavirus disease 2019 diha sa ilang mga vaccination sites. Maghatag kini og kahigayonan sa mga senior citizens nga hangtud ning pagsuwat sa balita wala pa gihapon makadawat og appointment kun kanus-a sila bakunahan.
Gihimo kini aron mas paspas ang pagpamakuna sa mga senior citizens ug niadtong mga masakiton o dunay comorbidity nga prayoridad sa vaccination program sa gobiyerno.
Nakadawat ang maong dakbayan sa miaging semana og 11,250 ka mga doses sa Johnson and Johnson nga gitagana para lang sa mga senior citizens sa dakbayan. CSi Subangdaku Barangay Kapitan Ernie Manatad nga maoy chairman sa Mandaue City Vaccine Board miingon nga sa unang semana nila nga pagpamakuna gamit ang Johnson and Johnson vaccine wala nila makuha ang ilang target nga 1,500 ka mga senior citizen ang mabakunahan niadtong Hulyo 19 hangtod sa Hulyo 23, 2021.
Tungod niini, si Manatad miingon nga gidawat na nila ang walk-ins nga pagbakuna sa tanang vaccination sites ug ilang gibutangan og priority lane ang mga senior citizen aron dili na sila magpaabot. Si Manatad miingon nga mahinungdanon gayod kaayo nga mabakunahan ang mga vurnerable sector sama sa mga senior citizens ug mga masakiton isip panagana sa pagsulod sa Delta variant coronavirus dinhi sa Sugbu. —Romeo T. Limpangog/IBM
Guadalupe gustong magpabutang og vaccination site
Tungod sa kadako sa ilang barangay ug maoy kinadak-an og populasyon sa Cebu City gihangyo sa kapitan sa Barangay Guadalupe nga si Michael Gacasan ang kagamhanan sa dakbayan nga pabutangan og vaccination site ang iyang barangay.
Matud pa sa kapitan nga duna ra silay lugar nga giandam kun maaprubahan ang iyang hangyo.
Ang Guadalupe maoy labing dako nga barangay sa siyudad ug aduna kini kapin sa 80,000 ka mga botante.
Nagkanayon si Gacasan nga pipila niya ka konsituwente ang nidangop kaniya gumikan kay wala pa gyud nakadawat og eskedyul sa pagbakuna bisan taud-taod na kini nagpa-rehistro sa online.
“Misuway lang ta og hangyo , kay kun ma-approve man gani, mas daghan ta og mga kaigsuonan nga maagni og samot nga magpabakuna kay duol naman lang ang site,” matud pa ni Gacasan.
Matud pa sa kapitan nga duna pu’y ubay-ubay nga mga sitio sa Guadalupe ang nahimutang sa bukirang bahin.
Matud pa ni Gacasan nga subsob ang ilang kampanya sa pagdasig sa katawhan nga magpabakuna. —IBM (BANATNEWS)