CEBU, Philippines — Todo na ang gibuhat nga preparasyon alang sa pagbukas sa klase sa pampublikong tunghaan karong September 13 alang sa school year 2021-2022.
Kini ang gibutyag kagahapon sa direktor sa Department of Education (DepEd)-7 Dr. Salustiano Jimenez.
Matud ni Jimenez nga ihaom gyud sa matag lugar ang pagpadangat sa learning materials.
Giangkon sa DepEd nga dili susama ang sitwasyon matag lugar hinungdan nga dili uniporme ang ilang mga pamaagi.
Kini sama sa pagpadangat sa mga module, padayon sa paghatod og leksiyon sa kahanginan pinaagi sa radyo ingon man ang pagpalapad sa digital learning materials.
Sa niaging tuig, ang Central Visayas adunay 1.8 milyon ka tinun-an sa pampublikong tunghaan.
Sa pagka-karon, aduna nay kapin sa 500,000 ang nagpa-enroll og sugod alang sa sunod nga school year ug kasagaran niini naa sa kindergarten, grade one ug grade 12.
Gipaniguro usab sa DepEd nga mahimong tulin ang dagan sa nagpadayon nila nga enrollment.
Matud ni Jimenez nga bisan sa dakong kausaban sa senaryo sa klase nga resulta sa pandemiya ilahang gipaniguro ang taas nga kalidad nga pagpangalagad nila ngadto sa mga tinun-an.
Sa Siyudad sa Sugbo gawas sa modular gipaagi usab sa radyo ang pagpadangat sa ubang leksiyon.
Ang maong programa gitawag og Education Laboratory on Radio diin gipaningkamotan kini sa Cebu City Local School Board (LSB) ug DepEd Cebu City Division.
Ang maong programa gisugdan kini sa unang quarter niining tuiga. BDB (BANATNEWS)