CEBU, Philippines — Walo ka mga tawo ang nasikop sa mga tinugyanan sa Philippine Drug Enforcement Agency Central Visayas atol sa ilang duha ka managlahi nga operation uban sa kapulisan sa Dakbayan sa Sugbo ug Mandaue City. Ang unang operasyon nahitabo sa Barangay Kamputhaw sa Cebu City ug pito ka tawo ang nasikop ug gipuhag ang usa ka drug den.
Ang nasikop sa drug den ang nagpadagan niini nga si Ronilo Palparan, alyas Panther, 52, construction painter, ug ang mga giingong parokyano niini nga sila si Walter Empenida, 46, , Joselito Dinglas, 39, , Roderick Lumba, 47, Giocarlo Lumasag, 25, Dante Rivera, 45, ug Carmel Galgo, 23.
Nasakmit gikan sa mga dinakpan ang 11 ka ptuos sa gituohang shabu nga motimbang og 11gramos nga mobalor og dul-an sa P75 mil, buy bust money ug drug paraphernalia. Sa buwag nga operasyon, nasikop ang usa ka real state agent diha sa barangay Cubacub, sa Dakbayan sa Mandaue, Miyerkules sa gabii.
Ang nasikop mao si Melissa Solitario, 41, taga Barangay Agus, Dakbayan sa Lapu-Lapu nga nakuhaan og 50 gramos nga gituohang shabu nga mobalor og P340 mil, buy bust money, cellphone ug sling bag. Sumala pa ni Leia Albiar-Alcantara, tigpamaba sa PDEA-7 ang pagkasikop ni Solitario, follow-up operation kini ilang nadakpang mitug-an nga kini maoy tinubdan sa ilang drugas. —IBM (BANATNEWS)