CEBU, Philippines — Morekomendar ang opisyales sa Dakbayan sa Talisay nga dili na pabalikon sa pagtukod sa ilang balay ang mga molupyo nga naapektohan sa baha niadtong Sabado sa gabii. Si kapitan Nelson Abellana sa Barangay Dumlog nagkanayon nga iyahang sugyot nga unta mapangitaan og kabalhinan ang mga molupyo nga naapektohan.
Si Abellana nagpatawag kini og sesyon sa iyang mga kauban aron makapagawas og pundo alang sa hinabang sa mga apektadong pamilya.
Si Alvin Santillana, pangulo sa City Disaster Risk Reduction and Management Office nibutyag nga iyaha usab kining irekomendar sa mayor tungod kay ang tubig mobalik gyud kini sa dili matag-an nga panahon. Si Mayor Gerald Anthony “Samsam” Gullas Jr. nagkanayon nga ipatawag niya ang local housing aron sutaon kong unsay mahimo ngadto sa mga apektadong pamilya.
Si Felipa Solana, pangulo sa City Social Welfare and Development (CSWD) nagkanayon nga nihatag sila og food packs sa mga naapektohan.
Base sa talaan sa CSWD 1,154 ka pamilya ug 4,887 ka indibidwal ang apektado sa maong insidente.
Adunay 39 ka totally damaged nga balay ug 297 ang partially damaged.
Sa laing bahin, si Konsehal Jerry Guardo nisusi sa Lahug River nga usa sa mga sapa nga niawas ang tubig hinungdan nga ang mga residente diha sa duol ang nabahaan niadtong Sabado.
Giingong gumikan sa proyekto nga gihimo sa Department of Public Works and Highways diha sa sapa hinungdan nga niawas ang tubig niini dihang nibunok ang uwan sa nahisgutang adlaw.
Nasayran nga ang DPWH nagpatuman sa ilang Metro Cebu Flood Control Project diha sa pito ka sapa diin nikabat ngadto sa P684 milyones ang gigahin niini nga pundo.
Usa ang Lahug River sa ilang gitrabaho samtang ang laing unom ka sapa nga gitrabaho sa maong ahensiya mao ang Tipolo River, Mahiga Creek, Tejero Creek, Guadalupe River, Kinalumsan River ug Balucao River. Decemay P. Padilla/BDB (BANATNEWS)