CEBU, Philippines — Gihimoan og surprisang operasyon sa Cebu City Transportation Office (CCTO) sa miaging adlaw ang mga nagbabag sa bike lanes.
Ubay-ubay ang nasita nga mga motorista sa pagpahigayon og surprise operation sa CCTO sa kadalanan sa may N. Bacalso, F. Ilamas, Tisa, Katipunan og V. Rama tungod sa pag-okupar niini sa lugar alang sa mga nagbisikleta.
Dunay 16 ka mga sakyanan ang naisyohan og citation tickets ug duha ang na-clamp.
Nasita usab nila ang usa ka trisikol, 5 ka trisikad, ug usa ka e-bike.
Kahinumdoman nga naumol ang Cebu City Ordinance 2408 nga giaprubahan sa konseho niadtong tuig 2014 nga maghatag og bike-friendly areas sa kadalanan ingon man usab sa paghimo og mga regulasyon sa maong butang. Jason David Bacus, CNU Intern/MEL
Employers pahatagon og kopya sa mga bakanteng trabaho
Giawhag sa konseho sa Siyudad sa Sugbo ang tanang employer sa siyudad pinaagi sa Cebu Chamber of Commerce and Industry (CCCI) nga mohatag og kopya sa mga bakante nga trabaho ngadto sa Department of Manpower Development and Placement (DMDP).
Tumong niini nga maabagan sa DMDP ang maong employers sa pagpangita og kwalipikado nga mga aplikante sa ilang kompaniya.
Ang resolusyon nga gipangamahanan ni Konsehal Raul Alcoseba alang sa maong katuyoan giaprobahan kini sa konseho sa siyduad.
Nagkanayon si Alcoseba nga naapektohan sa pandemiya ang tanang sekto ug dako og matabang ang panaghiusa sa kagamhanan ug sa business sector alang sa paghatag og trabaho sa mga residente sa siyudad.
Usa sa responsibilidad sa DMDP mao ang pagtuon, pag-compile og datos nga gikinahanglan sa pagsulbad sa problema sa unemployment sa siyudad.
Aduna usab kini programa diin katambayayong niini ang Department of Labor and Employment ug Philippine Overseas Employment Administration (POEA). BDB (BANATNEWS)