CEBU, Philippines — Grabeng nangaangol ang manag-inahan human nga nadasmagan sa ilang silingang nagmaneho og SUV ang ilang panimalay diha sa Sitio Campo 2, Brgy. Jaclupan sa Dakbayan sa Talisay kagahapong adlawa.
Ang mga biktima mao sila si Joan Lascun~a, 45 , ug si Dionesia Andaya, 79, nagpuyo sa maong lugar. Ang nakadasmag kanila mao si Jocelyn Nebria, 45, nga ilaha rang silingan.
Si Police Staff Sergeant Carlos Dicdican sa Talisay City Traffic Division nagkanayon nga atbang lang ang pinuy-anan sa mga biktima ug ni Nebria.
Matud pa nga si Nebria nagmaneho sa iyang Montero sa dihang kalit nga nilabang ang usa ka L300 van sa atubangan niini ug nasaghiran kini.
Apan nawad-an og kontrol si Nebria ug nalahos sa balay sa mga biktima nga niresulta sa kadaut sa ilang kalawasan.
Gidala sa tambalanan ang mga biktima lakip na si Nebria sa tambalanan tungod naglisod kini og ginhawa gumikan sa nerbyos.
Sa pikas bahin, usa sab ka balay ang gidaro sa usa ka dumptruck nga kargado og graba gikan sa Balamban padung sa Ronda sa dihang nakatagpilaw ang drayber niini samtang nagmaneho diha sa national highway sa Brgy. Ginolo sa lungsod sa Barili.
Ang trak gimaneho ni Joseph Aldan Cañete nasampak sa kongkretong balay ni Portunata Franza Villahermosa.Una pa nadasmag sa balay, naigo pa sa trak ang sakyanan Mercedita Villahermosa nga naka-park sa balay.
Maayo nalang nga walay nasakitan sa maong hitabo.— Ariza Rose Miranda /IBM (BANATNEWS)