Ruben Ecleo Jr. patay na

CEBU, Philippines — Gipahibalo sa Bureau of Corrections kagahapong adlawa nga namatay na ang kaniadto giilang supremo sa Philippine Benevolent Missionaries Association (PBMA) nga si Ruben Ecleo Jr.

Sumala pa sa report sa Philstar.com, ang tigpamaba sa BuCor nga si Gabriel Chalag mipahibalo nga si Ecleo nakabsan sa kinabuhi alas 12:20 sa udto kagahapon adlaw nga Huwebes.

Dugang pa sa tigpamaba sa BuCor nga si Chaclag,  dunay mga sakit nga gihambin si Ecleo sama sa obstructive jaundice and chronic kidney disease secondary to obstructive uropathy.

Atol ning pagsuwat sa balita, wala pa sab klaroha sa BuCor kun sa sud bas a iyang selda o sa infirmary sa New Bilibid Prison namatay si Ecleo.

Apan matud pa nga nataptan sa Covid-19 si Ecleo apan giingong “moderate” ra ang sintomas mag-usa ka semana na ang nakalabay.

Si Ecleo gipriso sa Bilibid sugod niadtong Agosto sa miaging tuig human siya nadakpan sa mga otoridad.

Si Ecleo kombiktado sa kasong pagpatay sa iyang asawa nga si Alona Bacolod niadtong tuig 2002 ug gihukmang mabilanggo tibuok niyang kinabuhi,  nakombikto sab kini og tulo ka kasong kurapsyon sa dihang siya pay mayor sa lungsod sa Dinagat Island didto sa Surigao del Sur, gisilotan siyang mabilanggo og 31 ka tuig.

Si Ecleo nahimo sab nga kongresista sa Dinagat,  nahimong No. 1 Most Wanted nga pugante sa Department of the Interior and Local Government sud sa pipila ka tuig sa wala pa kini nadakpan niadtong Hunyo 2020 didto sa Balibago, Angeles City sa Pampanga.

Sugod pa niadtong 2011 siya nagtagotago gikan sa balaod ug nigamit kini og nagkalain-laing mga pangalan. –IBM (BANATNEWS)