Retiradong kawani sa BFAR-7 gipusil patay

Ang biktima mao si Roberto Pacatang, minyo, retirado nga trabahante sa Bureau of Fisheries and Aquatic Resources-7 ug residente sa maong lugar.
PSN/File

CEBU, Philippines — Patay ang usa ka 63-anyos nga lalaki human kini pusila sa wala mailhing kriminal samtang nagsakay kini sa iyang motorsiklo niadtong Lunes sa gabii diha sa national highway sa Barangay Dawis Sur, Lungsod sa Carmen.

Ang biktima mao si Roberto Pacatang, minyo, retirado nga trabahante sa Bureau of Fisheries and Aquatic Resources-7 ug residente sa maong lugar.

Samtang ang mga mamumuno tulo ka wala mailhing lalaki kinsa nagsakay og motor.

Ang Municipal Disaster Risk Reduction and Management Office nitawag sa kapolisan human sa nahitabong pagpamusil ug dali nga niresponde ang sa alert team uban sa imbestigador nga si Police Staff Sergeant Ronald Anoche.

Atol sa pag-abot sa kapolisan naabtan pa ang biktima nga nagbuy-od diha sa iyang gisakyang motorsiklo ug daling gidala ngadto sa duol nga tambalanan apan gideklara kining patay na nga naabot sa tambalanan.

Base sa imbestigasyon sa kapolisan giingong padulong na mo uli ang biktima sa iyang balay gikan sa fish pen nga nahimutang sa Dawis Sur sakay sa iyang motorsiklo nga adunay plaka nga JZ7269 ug pag-abot diha sa highway giingong gisundan kini ug duha ka motorsiklo.

Advertising
Scroll to continue

Pag-abot diha sa lugar diin nahitabo ang insidente giingong ang usa sa duha ka motorsiklo nga nagsunod sa biktima ang ni-overtake kini samtang ang usa ka motorsiklo nga adunay back rider maoy nipusil kang Pacatang.

Human sa pagpamusil ang mga kriminal daling nisibat sa lugar padulong sa amihanang bahin. Si Pacatang nakaangkong og upat ka samad pinusilan sa iyang lawas nga gituohang hinungdan sa kamatayon niini.

Ang Scene of the Crime Operation nakakuha og upat ka kabhang sa bala sa kalibre .45 nga pistola ug usa ka slug diha sa lugar nga nahitaboan.

Ang kapolisan sa lungsod nagpahigayon og follow up nga imbestigasyon sa maong hitabo. BDB (BANATNEWS)

Show comments